PEL-OH NI DUYUS (Wienku Genantan)

Dr. Joni MN, M.Pd.B.I (Peri Mestike)

Nggeh kene awan jemen, Lemak ni gule kin pelulus mangan. Mesut ari anan na, ... I bibir i suwen tau cerak nge sawah lungi e, peri pe nge sawah belangi e. Sediken betul ke oya kene ate ni heme ni si lagu noya, aaa...oya le si kenak ne, cumen si kin capek ke seni dele pedi nge i awah len i wan ate e pe len, i awah nge sawah obehe i wan ate mugerebol, mejen iberet uah ni kedondong. Ike i tamsilen kene lagu saer ni ama Daman almarhum, "lagu telkah si mungenal nepekah i wan empus ni jema".

Ku-arap-arapen keta miyen, sentan i kerisili ku son-sonen te keta rupen nge i serlet benyet ku wan ni lenge, nggeh kene oya pe i renem miyen kene kin ganti ni seruwe kin penengkam ni keperas, mut, lokot merawe jahir sepat pe mukurung kuwasa. Jema ni rupen ne nge oya pelin kin buet te, si gatin ne cerak, peri rum perbueten nge lepas ku wan sipet ni belide renem, nggeh kene jema tuente pudah na "enti lagu mungunuli belide renem kam kase win-ipak ku kam kase we empunge". Ini manat ni tetuente kin kite, buge kite kati jeroh bang kase rum selamat dunie akherat.

Ninget kite pudahna deledi nge kite engon isi kin ara nin atawa pe tamak i one nge pasti ara mu-kertan orum mu-beldem. Ikemuduk ni ari oya;ara miyen mutetumpuk cike , benyet pe deba, anan-anan te munuling oya, oyale keta nge beselgengen lintah deba wan tis, deba nge sawah ku uku. Te ke rupen Lintah rum pacat ni lemik we, cumen oyale rayoh pemangane, nge korong tuh ne diri e, isi pakea korong keta i one we metuhe.

Lemak ni gule, lungi ni tikel sebenare oya nge belangi sediken jelen ne ku perbueten si jeroh-jeroh, ketape ike arahe ku simang-simut rum len si tuju, oya keta ini lagu buetni Sa'labah pudahna i masa ni Nabi. Betawe sipet ni lenge si i sesol benyet, oyape sediken nge lagu belide remet si berenem. Renyel kuarapen, te ha ike lintah rum pacat gere neh sak kin buet te, buge gip ari kite sipet rum buet si lagu nini.

"Jarak mi bele gip mi seteru"

 

(Peri Mestike)

%d blogger menyukai ini: