Gelah Mumengen Manat

Joni MN

Oleh : Dr Joni MN MPd BI

Enti lacaptu munulok orum kiri. Arawe ari kiteni mejen ike nge ngunuli ampang lagu si gere neh muwet ampang a. Ara miyen kite engon ike nge i ayas ni ampang geh batil miyen ku arap ne si bekelkup emun berkune, makin lagu si temerbang gelumange. Nggeh kene manat ni muyang rum datunte pudaha, "inget-inget sebelem kona - hemat jimet wan tengah ara".

Munyang te tengahna muninget ni kite, enti sawah kekuah ling, perbueten, atawa pe pemikiren kin jema, gelah mubulangen, nti gebah-gebih, sanakati turah beta, te bewene heme manusieni ara mu-rasa i ate we.

Ike ini sengkirene lepas we ku peebueten, ota gerale kera nge ku "Jis" Ike galip petetulok orum kiri, keta ike tar cerak pe ke, keta oya "jengkat". Buet jis orum jengkat, ulaken ku diri oya buet gere muperuluken orum cerak lagu gere mupatal, nge osop kal wan beberasan jema si jis - jengkat, rum jema si lagu nini meh kedelen ne nge teroroh akal ni blis si sergak sungak.

Lacap munulok nge sawah jis e, kemuduk ni ari oya miyen lencem becerak nge lagu jerejeten nge sawah jengkate. Ini si delen ne geh ari si gere mumetihi ulu nome we. Lencem bijak becerak ni lagu si gere bepawak, keta ike si rawan na pe lagu si nge osop pingang e. Jema si jis jengkat ni ike munyawah ni petanah pe leta nge meh beerbilen deba nge mupengeng bulange.

Oya le dasar ni perasan ni tetuente pudaha kati kite "hemat jimet ike wan tengah arawa...", . Kusonen miyen, gelah muninget kin inget-inget kite sebelem kona, te ke nge kona oya ke gere perlu pe neh si ingeti; nggeh kene ari anan te tengah na "enti sawah lagu kukur mugerali dirie". Maksud tujun ni muyang te munyawah ni manat ini, enti galak tu ike i amuh jema, enti galip pe aku.. aku, ike gere aku, galip memuji diri". Ini si gere i osah muyang datunte pudaha sawah ku kite seni, kena ini ku rusak we buhe, gere ara ku si jeroh, kotek we kite i wan ate ni jema.

Gere le nguk lelon ni apah i uweten kin dediangen ni budak ni, ike bebedak pe gere le renye nguk sawah mulopak, betawe ike becerak gere le renye lagu besuen tau i atas ni bibir. Kemuduk ni ari cerak oya miyen, enti sawah sergak lingang ni cerak, gelah i gipi terjah empah enti sawah oya mah kin resam iwan jep lo ni.

Ike ulak ku uwah ni rembiye nge beramuren keta resam ni dunie muperaturen, keta here le ara insen si murip selama e i dunie ni, lang entah suwi mera renye i rayi E kite, bik bera pe buet jeroh jarak jis jengkat ni oya enti teduh renye i bueten, keta ike si gere jeroha keta i taringen, kena bewene kite ni ku mate we beluhe, meh oya met te pe turah jema len we orum munuruse, mumani ne munyemiyang ne, rum mungubur ne, oyakati i larang anan, awan, datu, mutang te, enti dalih jis jengkat, enti kena nhe murwta tikik, mumotor belangi, mujebeten, sekulah atas, renye munulok pe orum dagu si gatin tetulok pumu kiri, tiak e pe nge sawah ku langit, ngw lagu meh ogoh jema ni i bubuhe

Agih si nge munge ike nge lepas i bueten, keta genap si belem jadinen pelejeren kin pengajin murib kune keta murib si jerohe, enti cerak musesorah, jaraki riah riye, i tertipen diri boh kati mulie orum i pemelie i.

Berijin..

 

Penulis adalah Dosen Alwashliyah Takengon, Aceh Tengah | Ka.Bidang Penelitian & Pendidikan, Pengembangan Majelis Adat Gayo Kabupaten Aceh Tengah
%d blogger menyukai ini: