AGIH-GENAP OYA, ENTI DALIH ANU TU EH

Oleh : Dr. Joni MN, M.Pd.B.I

"Pendidik biasanya terdidik, yang baik bisanya pasti tidak jahat, kalau ulama pasti tau dosa, jika pandai pasti tidak bodoh, jika ingin dihargai pasti tau menghargai".
--------
Gip pe ke diye langit ijo, jarak ton ne i atas ni emun putih, kebetape nguk we i tangak, atas pe ke diye bur, ton ne pe tetap i tuyuh ni tapak. Mutik ruluh bunge mala, gere ara si kekal i wan dunie ni Tuhen ni, gipi cerak sergak, peri mubarah, bepikir ling beluah.

Bierpe I pucuk ni bur pesesuk rum pejejem, teridahe calus rum kucak ke kite munengon jema si tuyuh so, te ke rupen beta we jema pe si munengon kite, meh kedelene, gere pe neh calus, rupen gere i engoni jema pe kite pesesuk i pucuk ni bur oya.

Wo sudere, gere dalih sergak tu ike becerak, gere dalih atas tu bange tiak, ike betul pe bange kite hebat, cumen biasae ike renggali, tajuk dilem rum selanga gere penah betihe diri belangi rum bau wangi. Kite-kiteni bebewente mahluk ni Tuhen, si ara rasa rum mu basa, enti bang sawah munyawah ni basa kin rusak-rasik ni ate rum rasa ni jema, kena kite pe gere mera i rusak rasik ni jema rasa ni atente.

Sudere-sudere bebewente ike remalan pe keta enti bang sawah begerdak. Ike mumotor pe kite enti dalih sawah i gah ku langit ijo, ike mukeduduken pe kite gere dalih bang renye mungucak ni jema, ike atas pe pangkat te, gere bang dalih lencem tu kite becerak, sawah gere neh muninget kune kite pudahna, ari si asal rum sahan keta kite, kin sana keta kite i duniye ni? Agih.. Agih... Terangi peninget geleh betimang rasa ike beperi rum ke sanah pe buwet.

Semisel ara we mujurah, keta enti munyintak, enti neh i kalei sedekah si nge i osah, enti i cecerak dalih ike munosah. Gere si tetaki peri beluah atawa bene si osah. Entimi dalih i cecerak ku kuwen rum ku kiri jeroh ni diri kotek ni jema. Gere si kalei neh tongar si nge manut. Atang buruk pe ara we mugune, nguk we kin tetinyelen gere renye murempilong.

Lang atawa suwi te kadang nge i talu si Sara so pe kite, nge agih enti dalih atas tu beperi, gere kerna kite atas pangkat rum nge mujabaten, renye jema ni ogoh bewene, dele cara mujadin diri mguk munapa-at kin jema dele gere renye turah lagu cara ni kite a. Enti renye i renahen jema, enti renye i perin ogoh jema, renye i perin jema kekanak si kerna cara ni jemawa gere dis rum cara nte, jaraki bele gip pi seteru, gere renye sawah rasae, lagu munenget ni lede sentan i ket renye jing, mejen mera sawahe lagu penyakit berwusen, berarih-arih lagu jorol mi taruk, meh kemokoten ne sawah we ku belanga.

Sudereku bebewen te, ulaki rum terangi peninget ulaken ku diri, ike dedalu keta kayu asal, gerupel dene ku serge. Gelah betimah lemut renye keta beturut payu kite ku kite sediken morum kite orum-orum. Gere kul kite sediken kite gere mera munengul ni kema, gere begalak jema kin kite, sediken kite dor muremeh ni jema, dll.

Study PM (Peri Mestike)
%d blogger menyukai ini: